مولوي احمدالله وثیق د روسیې په نړیوال ورزشي فورم کي د افغانستان استازیتوب وکړ

 

د افغانستان د المپیک، بدني روزني او ورزش عمومي رئیس مولوي احمدالله وثیق د روسیې په کراسنویارسک ښار کي د ورزش په ۱۴م نړیوال فورم کي ګډون کړی دی. په دي غونډه کي د بېلابیلو هیوادونو ورزشي استازو د سپورت د پرمختګ او د نړیوالو همکاریو د پیاوړتیا په اړه خپل نظرونه شریک کړي دي.

د ۳۵ هیوادونو استازو ګډون کړی
د ورکړل سویو معلوماتو له مخي، دغه نړیوال فورم د «روسیه؛ د ورزش هیواد» تر شعار لاندي جوړ سوی و او د نړۍ د ۳۵ هیوادونو ورزشي چارواکو او استازو پکښي برخه اخیستې وه.
ګډونوالو د ورزش پر اهمیت، د هيوادونو ترمنځ د اړیکو پر پراختیا او د ورزشي همکاریو پر پیاوړتیا خبري کړي دي. په دې غونډه کي د نظرونو تبادلې ته هم پام سوی، څو د سپورت په بېلابیلو برخو کي د ګډ کار لپاره زمینه برابره سي.

د افغانستان او نورو هیوادونو ترمنځ د ورزشي همکاریو موضوع
د فورم په څنډه کي د افغانستان د المپیک، بدني روزني او ورزش عمومي رئیس مولوي احمدالله وثیق د یو شمېر هیوادونو له ورزشي مسؤلینو سره جلا لیدني کړي دي.
د ورکړل سویو معلوماتو پر بنسټ، په دغو لیدنو کي د ورزش په برخه کي د دوه اړخیزو اړیکو او همکاریو د پراختیا پر لارو چارو خبرې سوي دي.
نړیوال ورزشي فورمونه د هیوادونو استازو ته فرصت برابروي چي خپلي تجربې شریکي کړي، د سپورت د ودي په اړه بحث وکړي او د راتلونکو همکاریو لپاره د اړیکو د پیاوړتیا هڅي وکړي.
د مولوي احمدالله وثیق ګډون هم د افغانستان د ورزش د ادارې په استازیتوب په داسي یوه نړیواله غونډه کي ترسره سوی، چي د ورزش د پرمختګ او نړیوالو اړیکو موضوعات یې د بحث مهمي برخي وې.