د افغانستان د معیار او کیفیت ادارې پلاوی د نړیوالو معیارونو په غونډه کي د ګډون لپاره روسیې ته تللی

 

د افغانستان د معیار او کیفیت ادارې یو دوه کسیز پلاوی د اسلامي هیوادونو د معیارونو او میټرولوژۍ انسټیټیوټ (SMIIC) په کلنۍ عمومي غونډه کي د ګډون په موخه د روسیې کازان ښار ته رسېدلی دی.
د یادي ادارې د معلوماتو له مخي، په دغه پلاوي کي د تخنیکي چارو مرستیال محمد آصف قانت او د دفتر رئیس وحید احمد بدري شامل دي.
د غونډي مهم موضوعات
د SMIIC کلنۍ عمومي غونډه د ۲۰۲۶ کال د اکتوبر له ۲۶مي تر ۲۸مي نېټې پوري د روسیې په کازان ښار کي ترسره کېږي.
د غونډي په اجنډا کي د سازمان د کلنیو فعالیتونو ارزونه، د بودیجې او مالي چارو څېړنه، د اوږدمهاله ستراتېژۍ په اړه بحثونه او د غړو هيوادونو ترمنځ د تخنیکي همکاریو پراختیا شامل دي. همدارنګه به د سازمان د راتلونکو پلانونو او د ګډو فعالیتونو د پیاوړتیا په اړه نظرونه تبادله سي.
د SMIIC د فعالیتونو موخه څه ده؟
د اسلامي هیوادونو د معیارونو او میټرولوژۍ انسټیټیوټ د اسلامي همکاریو سازمان (OIC) تر چتر لاندي فعالیت کوي. د دغه بنسټ اساسي موخه د غړو هیوادونو ترمنځ د معیارونو او تخنیکي کړنلارو همږغي، د محصولاتو د کیفیت لوړول، د حلالو معیارونو یووالی او د مصرف کوونکو د حقونو ساتنه ده.
د معیارونو همږغي کول د سوداګرۍ په برخه کي هم مهم بلل کیږي؛ ځکه ګډ معیارونه د محصولاتو د کیفیت په ارزونه او د هیوادونو ترمنځ د سوداګریزو اړیکو په اسانه کولو کي مرسته کولای سي.
د افغانستان د پلاوي ګډون
د معیار او کیفیت ادارې د پلاوي ګډون په دې نړیواله غونډه کي د نورو غړو هیوادونو له استازو سره د تخنیکي تجربو د شریکولو او د مسلکي اړیکو د پراختیا فرصت برابروي.
د ادارې د معلوماتو له مخي، افغان پلاوی به هڅه وکړي چي د نړیوالو تجربو له تبادلې او له اسلامي هیوادونو سره د تخنیکي همکاریو له پراختیا څخه ګټه واخلي.